Խաչատուր Աբովյանի անվան պետական մանկավարժական համալսարանում կայացավ հայաստանյան բուհերի և կրթական համակարգի միջազգային ծրագրերի համակարգողների մասնակցությամբ աշխատաժողով, որը նախաձեռնել էր Հայաստանում Էրազմուս+ ազգային գրասենյակը:
Հանդիպման նպատակն էր ներկայացնել այն փորձն ու արդյունքները, դժվարություններն ու մարտահրավերները, որոնք կուտակել են բուհերը տարբեր միջազգային ծրագրերի իրականացման փուլում:
Եվրասիա միջազգային համալսարանի իրավագիտության ամբիոնի վարիչի տեղակալ Նունե Ջոմարդյանը ներկայացրել է ԵՄ և գործընկեր երկրների բարձրագույն կրթության, հետազոտության եւ նորարարության բնագավառների միջազգայնացման ներդաշնակության զարգացման ծրագիրը (#HARMONY):
Արդյունքների մասին խոսելիս նա ընդգծել է, որ եռամյա ծրագրի արդյունքում մշակվել և վավերացվել է միջազգայնացման ռազմավարություն, ինչպես նաև ընդունվել է Կրեդիտների ամբողջական ճանաչման քաղաքականություն և ուսանողների հավաքագրման ռազմավարություն։
Եվրասիա միջազգային համալսարանը հանդիսացել է «Հարմոնիա» ծրագրի հայաստանյան գործընկերն ու իրականացնողը՝ համագործակցելով Իսպանիայի Սևիլիայի համալսարանի հետ:
ԵՄՀ կառավարման ամբիոնի վարիչ Աննա Մարտիրոսյանն էլ արդեն իսկ գործընկերներին է ներկայացրել ԵՄՀ նոր մեկնարկած «Արևելյան հարևանության երկրների համալսարանների արդիականացմանը խթանող կայունության և միջազգայնացման» (SIN-NEC) նախագծի ընթացիկ ձեռքբերումները։ Այս ծրագրի շրջանակներում իրականացվում են միջազգայնացման ինքնագնահատման գործիքներ և ռազմավարություններ, ինչպես նաև իրականացվում են վերապատրաստման միջոցառումներ:
Մասնակիցները կարևորել են նմանատիպ հանդիպումների կազմակերպումը ու արժեքավոր փորձի փոխանակումը:
